It-Twissija tal-Infern u l-Wegħda tal-Ġenna

Maħbuba binti, inti għaddejt minn persekuzzjoni terribbli, li Jien ippermettejt, sabiex teħles lil ruħek mit-turmenti tal-Infern. Issa inti ħielsa, u l-ispirtu tiegħek sejjer jgħinek ixxerred il-Kelma tiegħi, sabiex il-bnedmin ikunu jistgħu jinħelsu mit-tbatija li qegħda tistenniehom, jekk se jibqgħu daqshekk boloh li jaqgħu għax-Xitan (Satana). Inti binti, kont mibgħutha mill-bidu nett. Jiena qiegħed Inqawwik il-ħin kollu, u dan fi ftit jiem biss. Kif taħseb li se tkun fi żmien ġimgħa, sena jew sentejn oħra? Ġellieda u kuraġġuża sal-aħħar. Inti sejra taħdem miegħi sabiex tnaddaf l-erwieħ ta’ wliedi l-għeżież, li għalihom Jiena għandi Kompassjoni profonda u kollha Mħabba. L-Imħabba tiġri fil-Vini tiegħi bħal xmara. Il-Kompassjoni tiegħi qatt ma tonqos, minkejja l-fatt li dawn in-nies idawru wiċċhom in-naħa l-oħra.

Għidilhom, binti, li Jiena sejjer Insalvahom mit-turmenti tal-Infern. Għandi bżonnhom iduru Lejja mill-istat konfuż u mdejjaq tagħhom. Hemm mod wieħed biss għall-imħabba u l-paċi. Dan se jkun fil-Ġenna tal-Art il-Ġdida tiegħi, meta s-Sema u l-Art isiru ħaġa waħda. Possibbli ma jafuħx dan? Jaqaw qatt ma semgħu bil-Wegħda tiegħi tal-qedem? Il-Wegħda tal-Ħajja Eterna, fejn huma, anzi l-umanità kollha li sejra ddur Lejja, se jittellgħu bil-ġisem, bir-ruħ u bil-moħħ, lejn l-Art u s-Sema l-Ġdida, meta dawn jerġgħu jingħaqdu bħala l-Ġenna tal-Art, li ilha mwiegħda lil ulied Missieri. Emmnuni, qiegħed Nitlobkom. Aħsbu ftit. Jekk qatt ma ġejtu esposti għall-Iskrittura Mqaddsa, allura staqsu lilkom infuskom din il-mistoqsija sempliċi: Jekk tħossu l-imħabba f’qalbkom, minn fejn taħsbu li ġejja din? Mhix l-Imħabba li tkun qegħda ġġiegħlek tħossok ġentili, umli, imxennaq għat-tajjeb u ħieles minn kull egoiżmu? Jekk iva, allura din hija l-imħabba li Jiena qiegħed Inwiegħed lil uliedi kollha, li jduru lura Lejja.

Jiena Naf li huwa diffiċli, għeżież uliedi, li temmnu f’dinja differenti minn dik li qegħdin tgħixu fiha bħalissa. Ftakru li din id-dinja nħolqot minn Alla, il-Missier Etern, fejn imbagħad tħammġet mill-għemejjel tal-Qarrieqi. Hu, x-Xitan (Satana), huwa makakk ħafna. Intom, uliedi, ma tafux li l-ambizzjonijiet tad-dinja, żgur li ma jxebbawkomx u ma jissodisfawkomx? Iva, tħossu vojt minn ġewwa li ma tistgħux tispjegawh jew tifhmuh. Mhux veru dan? U mbagħad tistinkaw għal aktar u aktar. Imma xorta waħda, xorta ma tkunux sodisfatti meta taħsbu li suppost tkunu sodisfatti. Tafu għaliex jiġri dan kollu? Ħaristu f’qalbkom u staqsejtu għaliex? Tassew, għaliex? It-tweġiba hija sempliċi ħafna: Alla Ħalaq lill-umanità. L-umanità ġiet ittantata mix-Xitan. Ix-Xitan jeżisti f’din id-dinja sabiħa li l-Missier Etern tiegħi Ħalaq mill-Imħabba Safja tiegħu. Sfortunatament hu, x-Xitan, se jibqa’ jeżisti sat-Tieni Miġja tiegħi. Imbagħad se jiġi espost għall-gideb u l-qerq sfaċċat tiegħu, li wera f’uliedi. Madankollu, dakinhar ikun tard wisq għal ħafna minn uliedi, inklużi dawk li mhumiex ċerti jew joqogħdu lura milli jemmnu fil-Ħolqien Divin u Superjuri tas-Saltna ta’ Missieri.

Agħtuni widen issa! Jiena, Ġesù Kristu, is-Salvatur mibgħut sabiex Nagħtikom it-tieni ċans ħalli tidħlu fis-Saltna ta’ Missieri, isimgħu issa l-Wegħda tiegħi. Isimgħu Leħni, mibgħut bil-Grazzja Divina permezz tal-Viżjonarji u l-Profeti tiegħi fid-dinja tal-lum, u ifhmu li wliedi kollha huma ugwali f’għajnejn Missieri. Dawk li jimxu wara Missieri, huma mberkin, iżda jħossuhom ittortutati għal dawk l-erwieħ li ma jemmnux, u li jirrifjutaw li jisimgħu. Alla hu li Ħalaq id-dinja. Id-dinja ma saritx mix-xejn. Il-bniedem ma vvintax, u lanqas ma seta jivvinta xi Miraklu bħal dan, li x-xjenza qatt mhi ser tkun tista’ tispjega. Is-Sopranaturali Divin, qatt ma jista’ jinftiehem tassew, sakemm l-ulied kollha ta’ Alla, ma jċedux moħħhom, ġisimhom u ruħhom għall-Imħabba Safja li Jiena Noffri. Jekk jogħġobkom, Nitlobkom ilkoll, sabiex ma tiċħdux lill-Ħallieq tagħkom. Jekk jogħġobkom, tisimgħux il-qerq u l-gideb li qalilkom il-Qarrieqi, permezz tad-diviżjonijiet tal-Mażunerija, tal-Illuminati, tal-Profeti Foloz u tal-kulti strambi u kompletament ħżiena, li evolvew minħabba l-innoċenza tal-bniedem.

L-umanità hija dgħajfa. Anke l-akbar segwaċi qaddisin tiegħi, jaqgħu vittmi tat-tentazzjonijiet kontinwi tax-Xitan. Il-problema hi, li huma, dawk li jfittxu l-pjaċiri tad-dinja, ma jemmnux li hu jeżisti verament. Oħrajn jafu li hu reali u li jeżisti. Dawn huma dawk li Lili jikkawżawli l-akbar Qsim il-Qalb.

Jiena tant qiegħed inbati, li l-Feriti li ġarrabt fil-Kruċifissjoni terribbli tiegħi u li sofrejt, qed jerġgħu jinfetħu u jnixxu mill-ġdid, u qegħdin iħalluni f’Agunija, u bl-akbar Wġigħ fil-Ġisem, fir-Ruħ u fid-Divinità tieghi. Madankollu, Jiena qatt mhu sejjer nieqaf Inħobbkom ilkoll uliedi. Qiegħed Insejħilkom mis-Smewwiet u f’Isem Missieri l-Etern, li Ħalaq lil kull wieħed u waħda minnkom b’Imħabba Safja, sabiex tibqgħu sodi. Qisu li tiċħdu lix-Xitan. Emmnu li hu tassew jeżisti. Aċċettaw dak li qiegħed jagħmel. Iftħu għajnejkom. Jaqaw m’intomx tintebħu bir-rovina li qiegħed iħalli f’ħajjitkom? Possibbli li intom għomja?

Lill-għonja Jiena qiegħed Ngħidilkom: ieqfu. Aħsbu u staqsu lil Alla għal mument wieħed biss: ir-rwol tagħkom ta’ kif tinsabu tgħixu l-kmandamenti t’Alla qiegħed jogħġobkom? Tħossu li dan huwa tajjeb? Intom ċħadtuni għad-detriment ta’ dak li hu żejjed fid-dinja? Huma dawn l-istess  pjaċiri u dak li hu żejjed għalikom, li sejjer iħallulkom vojt ġewwa qalbkom. Intom tkunu tafu, u dan ġewwa qalbkom stess, meta ma tħossukomx tajjeb. Madankollu, intom xorta tibqagħu iżżidu fil-kilba għal aktar minn dawk il-wegħdiet vojta u eċċitanti, li jaf joffri l-Qarrieqi, sabiex jisirqilkom ruħkom.

Jiena qieġħed Nitlobkom ilkoll, speċjalment dawk uliedi li ġejtu miġbuda ġewwa l-għaqda tal-Illuminati, u entitajiet ħżiena oħra bħal dawn. Ladarba tkunu hemm ġew, intom tirċievu  l-kundanna eterna. Jaħasra, kif m’intomx tifhmu, li dak li ġejtu mwiegħda bi tpartit ta’ ruħkom, huwa gidba? Iva, gidba qarrieqa u tal-biża’. Intom qatt mhu sejrin tirċievu r-rigali mwiegħda minn dan il-Messaġġier Kriminali, li ġej mill-qiegħ tal-Infern. Bħala s-Salvatur tagħkom fuq is-Salib, Jiena tajt Ħajti sabiex insalvakom, mela issa, jekk jogħġobkom, tħallunix Nitlifkom issa. Jien Inħobbkom uliedi. Jiena qiegħed Nibki, hekk kif ninsab Nitlobkom għall-aħħar darba, sabiex Lili ma tiċħdunix, flok tiċħdu lill-Qarrieqi.

Jiena ma nistax Nindaħal fir-rieda ħielsa tagħkom, għax dak huwa wieħed mid-Doni mogħtija lilkom meta twelidtu fid-Dawl ta’ Alla. Jiena sejjer Nerga’ Niġi dalwaqt ħafna, kif bassret l-Iskrittura, u dan aktar malajr milli tistgħu taħsbu tafux. Id-dinja sejra togħdos fid-dlam u d-disperazzjoni. Madankollu, Jiena Naħfer lil kull wieħed u waħda minn uliedi, meta dnubiethom jiġu murija lilhom, ikunu kbar kemm ikunu kbar, jekk l-offizi tagħhom iqerruhom, Jiena Naħfiromlhom u dak il-hin stess waqt il-Qrar. Huma se jidħlu b’ruħhom u b’ġisimhom fil-Ġenna tal-Art, meta s-Sema u l-Art isiru ħaġa waħda, fejn intom ilkoll se tgħixu għall-eternità mal-familji tagħkom, għal dejjem ta’ dejjem.

Le, mhu sejjer jkun hemm l-ebda marda, l-ebda tħassir tal-ġisem, l-ebda ebda dnub: imma Mħabba biss. Din hija l-Wegħda tal-Ġenna tiegħi. Ħadd ma jkun jonqsu xejn. Kulħadd se jgħix fl-armonija, fil-ferħ u fl-mħabba.

Araw li ma tiċħdux din il-Ħajja Minni, minflok ticħdu l-ħajja li qiegħed iwiegħedkom ix-Xitan! Hu qiegħed jigdbilkom. Jekk issegwu xi triq, fejn Alla, jew Jiena, Ġesù Kristu, s-Salvatur tiegħek, mhuwiex parti minnha, allura tkunu fit-triq tal-kundanna eterna. Intom sejrin twerżqu ​​b’biza’ tal-waħx, meta tindunaw b’dan l-iżball li tkun għamiltu. Dakinhar titolbuni Ħniena, iċċarrtu wiċċkom u tqattgħu xagħrkom, imma peress li kellkom ir-rieda ħielsa, Rigal mingħand Missieri, din qatt ma tista tittieħed mingħandkom, ikun tard wisq. Meta intom tagħżlu din it-triq falza, intom tbatu l-kundanna u tmorru tinħarqu fl-Infern għal dejjem. Din hija ħaġa reali ħafna.

L-akbar kastig etern huwa li fl-aħħar tindunaw li veru hemm Alla. Li Jiena, is-Salvatur tagħkom, Ġesù Kristu, fil-fatt neżisti, imma li f’dak l-istadju, ma jkun baqa’ l-ebda mod sabiex issalvaw lilkom infuskom. Il-familja tagħkom tkun tista’ tħares lejkom min-naħa l-oħra. Meta jiġri dan kollu u tirrealizzaw din l-verità tal-waħx, imbagħad ikun tard wisq. Araw li tiftakruhom dawn il-kliem. L-akbar saħta eterna hija meta wieħed ikun jaf li qatt mhu sejjer jara Wiċċ Alla. Dak ikun l-akbar turment u li se jibqa’ magħkom għal dejjem fin-nar tal-Infern, fejn l-uġigħ huwa kontinwu u ma jaqta xejn. Intom, minflok ma tgawdu l-Ġenna mwiegħda lilkom, minħabba l-gideb tal-Qarrieqi, tispiċċaw fil-kurituri orribbli tal-Infern. Tinsewx, li l-Infern jeżisti tassew u jfisser tbatija eterna.

Jekk jogħġobkom, intom ilkoll li ma temmnux li Jiena qiegħed Nikkomunika mal-umanità, qiegħed Nitlobkom titolbu lill-Qalb Imqaddsa tiegħi. Itolbu kuljum il-Kurunella tal-Ħniena Divina tiegħi fit-3 ta’ wara nofsinhar. Jiena sejjer Inwieġeb għat-talba tagħkom b’Imħabba, li tħossuha dak il-ħin stess. Isa, żommuli Jdejja wliedi. U titilquhiex. Jien Inħobbkom ħafna lkoll, tant li Jiena tajt Ħajti għal kull wieħed u waħda minnkom, sabiex Issalvaw. Din id-darba Jiena Ġej sabiex iġġudikakom. Issa, għalkemm Inħobbkom, Jiena ma nistax nindaħal fid-Don tar-rieda ħielsa li Ngħatatilkom mill-Għażiż Missieri. Nittama li permezz tal-Viżjonarji u l-Profeti tiegħi tal-lum, intom ilkoll fl-aħħar tisimgħu. Qisu li tiftakru li l-Verità hija t-triq għas-salvazzjoni eterna u l-bidu ġdid, meta l-Ġenna tal-Art terġa’ lura fid-Dinja.

Il-gideb, iħajjarkom kemm iħajjarkom għal ħeżen, huwa biss gideb. Dan il-gideb huwa maħsub biex jisraq l-erwieħ maħbuba, li Missieri, l-Ħallieq u li Bih saret id-Dinja, ma jistax Jitlaq minn Idejh.