Kliem ta’ Faraġ lil Dawk li Jiddubitaw Dawn il-Messaġġi

Binti, qis li tibqa’ soda. Inti m’għandekx toqgħod tittortura lilek innifsek billi taqra l-kummenti fuq l-internet, fejn juru l-mibegħda li ħafna u ħafna minn uliedi jħossu Lejja. Iċ-ċaħda tagħhom Lejja, la bdiet u lanqas spiċċat mal-Kruċifissjoni tiegħi. Għadha għaddejja sal-lum, bħala riżultat dirett tal-mibegħda mxerrda mix-Xitan (Satana) permezz ta’ wliedi. Inti sejra tbati f’Ismi u hekk ukoll is-segwaċi l-maħbuba tiegħi, li jissograw jiddefenduni. Dan, maħbuba binti, mhuwiex xi ħaġa ġdida. Huwa biss xokkanti għalik li bħalissa qiegħda tarah.

Anke dawk is-segwaċi tiegħi li jsostnu li jemmnu Fija, se jsibu dawn il-Messaġġi diffiċli biex jiddiġerixxuhom. Maż-żmien, meta l-prova tinkixef, dawk kollha li jisqarru li jobogħduni sejrin jerġgħu jevalwaw il-fehmiet tagħhom. Xi wħud sejrin jibku meta l-ħlewwa tal-Verità tintwera lilhom. Oħrajn, xorta sejrin jibqgħu jiddubitaw u jiddubitaw, għaliex se jagħmlu l-iżball li jippruvaw jaslu għad-deċiżjoni finali tagħhom permezz tar-raġunar uman. Mur issa u ara li titlob għal dawk kollha li jiddubitaw dawn il-Messaġġi. Huwa sew li huma jagħmlu dan. Għal dawk li jiġu f’Ismi, huma jridu jaċċettaw li sejrin jiġu sfidati, u bir-raġun. Għalhekk, il-Messaġġi kollha għandhom jiġu eżaminati bir-reqqa. Mur issa fil-paċi u l-imħabba. U ftakar, li Jien Inħobb lil uliedi kollha, inklużi dawk li jistqarru bil-miftuħ li jobogħduni.