Għaliex Jien Nikkomunika mad-Dinja b’Dan il-Mod

Maħbuba binti l-għażiża, issa wasal iż-żmien li tirrifletti fuq il-Messaġġi Sagri tiegħi u tiżgura li kemm jista’ jkun midinbin madwar id-dinja, jagħtu kashom.

Araw li ma tagħmlux żball, għaliex dawn il-Messaġġi qegħdin jingħataw lid-dinja bħala rigal, sabiex jgħinu fis-Salvazzjoni tagħkom ilkoll, intom uliedi kollha kemm intom, inklużi dawk li qegħdin isegwu toroq differenti lejn Alla l-Missier Etern.

In-nies, speċjalment il-Kattoliċi, se jkunu konfużi meta Jiena ma npoġġihomx qabel uliedi l-oħra ta’ twemmin differenti. Il-Kliem li Jiena għażilt huma mfassla apposta, sabiex jinstemgħu minn kulħadd, u mhux biss mill-ftit magħżula. L-Imħabba tiegħi ma tagħzilx bejn persuna jew oħra. Għal dawk li jiddubitaw, dwar dan il-mod ta’ kif Jiena nitkellem mal-umanità, permezz ta’ din il-messaġġiera, isimgħuni issa. Filwaqt li intom, is-segwaċi tiegħi, tifhmu li l-Verità qatt ma nbidlet minn żmien il-Kruċifissjoni tiegħi, kunu afu mela, li Jien irrid nestendi l-Imħabba tiegħi lil-ulied kollha ta’ Alla. Ħadd mhu aħjar mill-ieħor.

Binti, inti m’għandekx twieġeb jew tipprova tiddefendi l-Kelma tiegħi, meta inti tiġi sfidata biex tispjega għaliex Jiena nitkellem b’dan il-mod. Il-Kelma tiegħi hija Divina. Din m’għandhiex tinbidel jew tiġi emendata biex taqbel ma’ dawk li jqisu lilhom infushom esperti fil-liġi teoloġika. Dan għaliex il-Kelma tiegħi se tingħata lid-dinja b’mod ċar u b’lingwa li tinftiehem mill-umanità tal-lum. Ħafna sejrin jistaqsu: għaliex dan il-Kliem ma jużax l-istess terminoloġija, jew espressjonijiet użati mill-Profeti u l-Appostli tiegħi tal-qedem, u Jien issa se nwieġebhom.

Ftakru li t-Tagħlim tiegħi qatt ma jinbidel. Ma jimpurtax liema lingwa nuża llum biex nikkomunika b’mod modern, il-Verità tibqa’ l-istess, mhux minsusa.

Oqogħdu attenti mill-viżjonarji jew nies li jkollhom dehriet, li jsostnu li qed jirċievu messaġġi Mingħandi, fejn jużaw lingwaġġ antik jew siltiet mill-Bibbja Mqaddsa. Għaliex dan mhux il-mod kif Jiena nikkomunika mal-umanità tal-lum. U għaliex Jiena qiegħed nagħmel dan? Ma nkunx forsi qiegħed inbegħed Minni ġenerazzjoni ġdida? Ta’ dawk li mhumiex konxji tal-lingwa li tinsab fil-Ktieb Imqaddes ta’ Missieri?

Is-sempliċità hija ċ-ċavetta wliedi, meta intom tikkomunikaw il-Kelma l-aktar Imqaddsa tiegħi. Ftakru, li meta tgħallmu lil ħaddieħor dwar il-Verità tal-Eżistenza tiegħi, is-sempliċità fl-imġieba tagħkom hija essenzjali. Jekk ma tagħmlux dan, ma tilħqux dawk l-erwieħ mitlufa, għaliex huma jagħlqu widnejhom għalikom.

Il-Messaġġ ta’ Mħabbti huwa sempliċi ħafna. Jiena Hu l-Ħajja li jixxennqu għaliha wliedi fid-dinja. Spjegawlhom li Jiena l-Verità. Agħmluwilhom ċara, li mingħajri m’hemm l-ebda Ħajja Eterna. Użaw il-profeziji, li Jiena qiegħed niżvela lil din il-messaġġiera, sabiex tiġbdu l-attenzjoni ta’ dawk li ma jemmnux. Għax għalhekk dawn qegħdin jingħataw lid-dinja. Mhux biex ibeżżgħuhom, imma sabiex ikollhom il-provi li Jiena tassew qiegħed nikkomunika llum, u dan b’mod li bih, l-aktar Kelma Mqaddsa tiegħi, mhux biss tinstema’ imma tiġi emmnuta.