Mistoqsijiet lil Ġesù.
Mill-Ktieb tal-Verità. Tweġibiet mill-Maħbub Salvatur tagħna Sidna Ġesù Kristu, lil Marija Ħniena Divina, tal-1 ta’ Awwissu, 2011, fil-11.30 pm.
Wara li rċeviet il-Messaġġ intitolat “Araw li Tkunu Ppreparati l-Ħin Kollu” il-viżjonarja rat xbieha ta’ Ġesù li fiha deher imdejjaq. Imbagħad staqsietu għadd ta’ mistoqsijiet li Hu wieġeb għalihom.
Mistoqsija lil Ġesù: “Int imdejjaq?”
Tweġiba: “Iva, u għajjien. Id-dnubiet tal-bniedem qegħdin jaqsmuli Qalbi fi tnejn.”
Mistoqsija lil Ġesù: “X’jista’ jgħin?”
Tweġiba: “It-talb u ħafna talb. Id-devozzjoni tas-segwaċi tiegħi permezz tar-reċitazzjoni ta’ kuljum tal-Kurunella tal-Ħniena Divina u r-Rużarju Mqaddes se jsalvaw lil uliedi. Huma, is-segwaċi tiegħi, iridu jipperseveraw anke jekk dan ikun diffiċli.”
Mistoqsija lil Ġesù: “X’inhu l-aktar li jdejjqek?”
Tweġiba: “Dawk in-nies li mhux biss jobogħduni, imma li għażlu li jqimu lix-Xitan (Satana) f’ritwali oxxeni fejn ma jistgħux jaraw kemm qiegħed jigdbilhom.
Il-Qaddejja Sagri tiegħi (is-Saċerdoti) li ma baqgħux iħobbuni.
Dawk li jippersegwitaw lil ħaddieħor.
Dawk il-qattiela mingħajr ebda konsiderazzjoni għall-ħajjiet ta’ wliedi.
L-abort, l-agħar forma ta’ ġenoċidju. Jien Inxerred id-dmugħ il-ħin kollu għall-erwieħ ċkejnin tiegħi, li qatt m’huma sejrin jieħdu l-ewwel nifs tagħhom.
Il-gwerra u l-faċilità li biha tiġi imposta, u ġeneralment minn dawk, li kieku kellhom jitqiegħdu f’nofs il-kamp tal-battalja, jaħarbu bil-biża’. Ħafna minn dawn in-nies li jiddikjaraw gwerra, jagħmlu dan biss biex jiksbu l-poter. Huma Joffenduni ħafna.”
Mistoqsija lil Ġesù: “X’jagħmlek ferħan?”
Tweġiba: “Il-fidi tas-segwaċi tiegħi u ta’ dawk li huma determinati li jgħinuni Nsalva l-erwieħ. Jien Inħobbhom b’tant Tenerezza u Kompassjoni. Huma sejrin jiġu ppremjati bil-kbir fis-Saltna ta’ Missieri.
